عايز أسألك سؤال مهم كده.. عمرك فكرت إيه ممكن يحصل لو تخلفت عن سداد أقساط القرض بتاعك؟ إيه اللي هيحصل لو لقيت اسمك فجأة مكتوب في القايمة السودا؟ متخيل تبقى محتاج قرض تاني أو بطاقة ائتمانية جديدة وتلاقي نفسك مرفوض في كل البنوك؟
طيب يا سيدي خليني أحكي لك البلاك ليست أو القايمة السودا زي ما بنقول عليها هي قايمة بيتم إدراج العملاء اللي مابيلتزموش بسداد التزاماتهم المالية للبنوك
يعني باختصار لو بتاخد قرض ومتأخر في السداد بشكل متكرر أو مش بتدفع خالص، اسمك بيتحط هناك ودي مش مجرد مشكلة بسيطة؛ دي ممكن تكون أزمة حياتك المالية كلها.
"البلاك ليست ليها كذا مستوى في ناس بيبقى ممنوع تمامًا أي بنك يتعامل معاهم.. وفي ناس ممكن تتعامل مع البنوك، بس بموافقة كتابية خاصة.. وفي ناس بتكون خلصت السداد، بس تاريخهم المالي السيئ بيبقى محفوظ على السيستم كمرجع."
الأهم كمان إن القايمة دي مرتبطة بحاجة اسمها التقييم الرقمي. ده رقم بيطلع من شركة I-Score وبيحدد موقفك المالي: هل إنت عميل موثوق ولا عندك مخاطرة؟ كل ما رقمك كان عالي، كل ما فرصك في الحصول على تمويل أو قروض جديدة كانت أفضل
"طيب، السؤال اللي أكيد بيدور في دماغك دلوقتي: أعمل إيه عشان أحمي نفسي من دخول القايمة السودا؟
الإجابة بسيطة، بس محتاجة شوية التزام منك ركز معايا.. سدد أقساطك في مواعيدها. أي تأخير ممكن يخليك مرشح فوري للبلاك ليست.. وما تطلبش قرض أكبر من طاقتك واعرف حدودك المالية وخليك دايمًا ملتزم بيها.. كمان راجع تقريرك الائتماني بشكل دوري ده بيضمن إنك متابع أي خطأ ممكن يحصل، ولو في مشكلة تتواصل مع البنك على طول.. ولو حصلت ظروف قهرية منعتك من السداد اتكلم مع البنك فورًا صدقني هم هيكونوا مستعدين يسمعوا ويحاولوا يلاقوا حل
وفي حاجات تانية كمان، زي إنك تكون منظم في سداد فواتيرك كلها، وتحدد أولوياتك المالية. وكمان، ما تستخدمش بطاقاتك الائتمانية أو القروض بشكل مفرط التنويع في مصادر الائتمان - لو كنت قادر على إدارته - هيكون نقطة إيجابية لصالحك
في الآخر.. فاكر لما قلت لك في الأول إن البلاك ليست ممكن تكون أزمة حياتك؟ الحقيقة إنك لو التزمت بالنصايح دي، عمرك ما هتكون في الأزمة دي. دايمًا خلّي سجلك المالي نظيف، وخليك واثق إنك في أمان. دلوقتي، دورك إنك تبدأ تطبق، ومستنيين نشوفك في قائمة العملاء المثاليين، مش القايمة السودا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
