كتير من بطاقات التموين بتتعرض أحيانا للتلف بسبب كتر الاستخدام، وكمان بسبب كثرة عمليات إدخالها في ماكينات صرف السلع التموينية، فكل ده بيؤدي إلى أعطال في المنظومة، وكمان ممكن تتعرض إنك تفقد بطاقتك.
عشان كده، الدكتور شريف فاروق، وزير التموين والتجارة الداخلية، أكد على ضرورة تسريع إصدار بطاقة التموين (بدل فاقد أو تالف) لضمان استمرار المواطنين في الحصول على الدعم التمويني.
وقال كمان، إن هيتم تسريع استخراج بطاقات بدل الفاقد وبدل التالف التموينية للمواطنين خلال يومين بحد أقصى، بعدما كانت 15 يوم، برسوم استخراج بدل تالف 20 جنيه، و50 للفاقد.
وبالتزامن مع قرار وزير التموين ده، فكتير من المصريين دلوقتي بيسألوا عن الدعم النقدي الجديد اللي الحكومة تنفذه قريب.
وفي الحقيقة، فعليا وزارة التموين ناوية تنفذ نظام الدعم النقدي بدل العيني، يعني حضرتك هتاخد فلوس بدل السلع التموينية، بس لسه القرار الرسمي ماصدرش ومش هيطلع غير بعد الموافقة على النظام الجديد من مجلس الحوار الوطني، ولو فعليا وافق هيتم تطبيق الدعم النقدي من بداية السنة المالية الجديدة في 2025.
ونقدر نقول إن من أهم مميزات الدعم النقدي، هي ضمان حصول المواطن على حقه وتقليل فرص الفساد المرتبطة بتوزيع السلع العينية، يعني هيحصل عدالة بين المواطنين.
كمان، الدعم النقدي من خلاله الدولة بتضمن وصول المساعدات إلى الفئات المستحقة مباشرة، وده بيقلل من فرص الفساد والتسرب في منظومة الدعم العيني، وكمان بيتميز بمنح المواطنين خيارات متعددة عند اقتناء السلع اللي عايزين يشتروها، يعني بالفلوس تشتري اللي أنت محتاجه.
ضيف على كل ده، إن الدعم النقدي بيحسن جودة الخدمات المقدمة للمواطنين وبيساهم في الارتقاء بمستوى المعيشة، وكمان بيعزز الاستقرار المالي للدولة، وده بيقلل الأعباء عليها.
أما عن ميعاد تطبيقه، فزي ما قولنا ممكن يبدأ بشكل تدريجي مع بداية العام المالي 2025، بعد اكتمال التجارب الميدانية، عشان الحكومة بتسعى لتحقيق التوازن بين تلبية احتياجات المواطنين وضمان استدامة النظام الاقتصادي، بما يتماشى مع رؤية مصر 2030 للتنمية المستدامة.
ولو حضرتك عايز تعرف هينوبك كام من الدعم النقدي، فكل فرد بيحصل على تموين هياخد 200 جنيه، ولو في أسرة مكونة من 4 أفراد هتحصل الأسرة كلها على دعم نقدي بقيمة 800 جنيه كل شهر، وكل ده عشان حضرتك تشتري اللي أنت عايزه وتاخد حقك كامل، من غير ما التموين يفرض عليك سلع معينة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
