مفاجآت الجمعة البيضا.. شوف تخفيضات الملابس وصلت لكام

هي تخفيضات الجمعة البيضا وصلت لفين، وهل هي للأجهزة الكهربائية والسلع المعمرة والاستهلاكية بس، ولا ممكن تكون كمان للهدوم، ونسب التخفيضات وصلت لكام، وإيه هو أفضل وقت للشراء...

طبعا، الجمعة البيضا حدث استثنائي بيستناه المصريين كل سنة، وفيه بتتسابق المتاجر لتقديم تخفيضات كبيرة على مختلف المنتجات والخدمات، لأن الموسم ده بيعتبر فرصة مثالية للاستفادة من العروض الكبرى والاستعداد لموسم العطلات.

والجمعة البيضا هي النسخة العربية من «الجمعة السودا» العالمية، وفي مصر بنسميها البيضا عشان قدسية يوم الجمعة عندنا، وفي الحدث ده ناس كتير بيبقى عندها شغف التسوق عشان التخفيضات اللي بتبدأ من 10% وممكن توصل ل 50% وكمان  80% في بعض الحالات، زي الموبايلات والأجهزة الإلكترونيات وأدوات المطبخ والأجهزة المنزلية والمجوهرات والألعاب والهدايا، وأخيرا الملابس.

فناس كتير بتدور دلوقتي على عروض وتخفيضات الجمعة البيضا، عشان يحصلوا علة سلع مناسبة وبتخفيض معتبر، يعني الشرا هيكون بخصومات بتوصل ل 50%، على عدد كبير من السلع، وأهمها الملابس.

ووصلت تخفيضات الجمعة البيضا على الملابس الجاهزة، ما بين 10 إلى 50%، ونقدر نقول إن الوقت الحالي مناسب جدا لشراء الملابس الشتوية خاصة بعد تغير الطقس، وانخفاض درجات الحرارة، وإقبال ناس كتير على شراء الملابس الشتوية.

ولو ناوي تشتري، فالأفضل تشتري إلكتروني بدل الزحمة والمشوار، وممكن بسهولة تغير المقاسات أو تستبدل القطع المشتراة من خلال فروع المحلات.

وقبل ما تشتري، هنقدملك شوية نصايح مهمة خاصة بالملابس الشتوية، واللي أولها إن حضرتك تكون عارف كويس المنتجات والموديلات، قبل ما تروح للمحل أو تشتري من خلال موقعه أو صفحته على مواقع التواصل.

وحاول تحدد أولوياتك، زي انك تختار الألوان المناسبة لك، زي الأسود والأبيض والرمادي والبني والبيج، لأن الألوان دي بتوفر خيارات كتير عند تنسيقها مع الملابس التانية.

وخد بالك من القماش اللي مصنوعة منه القطعة، يعن زي الصوف والقطن والكشمير واختار اللي يناسبك، وحاول تستفيد من الخصومات وماتتسرعش عند الشرا.

وأخيرا، لو استقريت على جاكت أو بنطلون، فلازم تراجع الموديل والمقاس كويس جدا،  كل ده بجانب تاخد فاتورة شراء ضريبية عشان تتجنب مشكلات الاستبدال، أو لو في حالة وجود مشكلة بالقطعه المشتراة، تقدر ترجعها أو تستبدلها تاني.