رد أحمد حسام ميدو نجم الزمالك السابق، على الهجوم الذي تعرض له في الأيام الأخيرة بعد إعلانه عدم تشجيع الأهلي في كأس العالم للأندية، وعبر عن حزنه بسبب اختيار التوقيق في حدث مهم يخص النادي الأهلي، ولكنه مقتنع بأنه لا يشجع في مصر إلا الزمالك فقط، ويستعرض موقع تحيا مصر رسالة أحمد حسام ميدو.
رسالة أحمد حسام ميدو
وكتب ميدو في رسالته عبر "إكس"، أنا ابن الزمالك وأكبر فخر ليا في حياتي إني ابن المدرج ابن الثالثة يمين بلعب في الزمالك من وأنا عندي ٩ سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك.
وتابع ميدو، بطاقتي وأنا عيل صغير هي كارنية اتحاد الكورة اللي مكتوب عليه اسم الزمالك، تتلمذت على ايد مدربين عظماء علموني إني انتمي لفريقي بس وما أشجعش أي نادي ثاني في مصر بالذات إلا نادي الزمالك أي كان بيلاعب مين ولكن في نفس الوقت اتربيت إني احترم كل المنافسين وأهنيهم لو كسبوا وأباركلهم وأقولهم هارد لك لو خسروا.
وزاد ميدو، هو ده معنى الروح الرياضية بالنسبة لي، لما اتسألت في الاستوديو هتشجع الاهلي في كأس العالم للأندية رديت بطبيعتي دون أي نفاق أو كذب لأن بكل بساطه مفيش حاجه في الدنيا تستاهل انك تكون كذاب ومنافق.
وأردف ميدو، اتفق معاكم أن التوقيت ما كانش مناسب وبعتذر لأي حد زعل إني قلت الكلام ده في حدث مهم يخص النادي الأهلي وأنا شايف الناس اللي زعلت بخصوص أن الوقت مش مناسب عندهم كل الحق.
أحمد حسام ميدو
وأشار ميدو، أما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت، أما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على اجابات مختلفة في السنوات الاخيرة من ناس تصدروا المشهد في الاعلام وهما أكتر ناس بيأذوا المنافس في الخفاء وأكتر ناس بتتمنى من قلبها خسارة المنافس من جواهم.
واختتم ميدو رسالته، مش هرد على أي حد هاجمني لأن بكل بساطه أنا في مرحلة في حياتي شايف ان مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده، مره ثانيه بعتذر إني كنت سبب في جدال قائم الايام اللي فاتت للأسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة.
