يا ترى ليه فجأة بقينا بنسمع عن تخارج الأجانب من أدوات الدين المصرية؟ إيه اللي حصل؟ وهل الوضع بيشكل خطر على الاقتصاد ؟ وإزاي كل ده مرتبط بالدولار وسعر الصرف؟ والأهم.. هل في أمل الأمور تتحسن قريب؟
في الأيام الأخيرة الكلام عن تخارج الأجانب من أدوات الدين المصرية شاغل بال ناس كتير.. وده لأن الأرقام بتتكلم لوحدها من بداية نوفمبر لحد دلوقتي الأجانب باعوا أوراق دين حكومية بقيمة أكتر من 1.13 مليار دولار
طب ليه الأجانب قرروا يسحبوا فلوسهم بالشكل ده؟ وهل ده معناه إن السوق بقت في أزمة؟
خلينا نبدأ بأول وأهم حاجة.. الدولار.. سعر الدولار مقابل الجنيه بقى عامل ضغط كبير على المستثمرين مع كل ارتفاع جديد للدولار الأجانب بيلاقوا إن قيمة استثماراتهم في أدوات الدين بالجنيه بتقل يعني بكل بساطة العائد اللي كانوا بيكسبوه بالجنيه بيضعف لما يحولوه لدولار.. وده خلاهم يفكروا ويقولوا ليه نستنى.. ده غير إن التوترات الجيوسياسية في المنطقة سواء في سوريا أو مناطق تانية خلت المستثمرين يحسوا بعدم استقرار أكتر وده دايماً بيخلّي رأس المال يدور على مناطق أكثر أمان
ورغم ان العوائد على أذون الخزانة قصيرة الأجل في مصر بقت بتوصل لـ31.4%. وده رقم كبير جدًا مقارنة بدول تانية لكن حتى العائد العالي ده مش قادر يغري المستثمرين الأجانب.. لأن مع توقعات استمرار ضعف الجنيه أي مكاسب بيحققوها بتتآكل قدام الدولار.. وفي نفس الوقت في توجه واضح ناحية الأدوات قصيرة الأجل أكتر من طويلة الأجل.. المستثمرين بيدخلوا على حاجات سريعة ياخدوا مكسب صغير ويخرجوا قبل ما سعر الصرف يضغط عليهم أكتر
طب هل ده معناه إن السوق خلاص فقدت الثقة؟
مش بالضرورة. محمد النجار، مدير وحدة أدوات الدين بشركة نير للاستشارات قال إن السوق مش ميتة.. لكن فيه حالة ترقب وانتظار يعني المستثمرين مستنيين يشوفوا إيه اللي هيحصل في الفترة الجاية، سواء على مستوى السياسة النقدية أو التطورات في سعر الصرف.. وعلى الناحية التانية تراجع معدلات التضخم في مصر بنسبة بسيطة لحد 25.5% ممكن يدي أمل إن البنك المركزي يثبت أسعار الفايدة شوية لحد ما الصورة توضح أكتر
خلاصة الكلام تخارج الأجانب مش جديد لكن الحدة بتاعته المرة دي أثارت قلق البعض.. الوضع محتاج تحركات مدروسة عشان نعيد الثقة للسوق ونثبت الجنيه قدام الدولار.. والسؤال المهم دلوقتي هل الحكومة هتقدر توازن بين جذب الاستثمارات وحماية اقتصادها؟
الأيام الجاية هنعرف تفاصيل أكتر .. وطول الوقت هنقولكم ايه الجديد وهنشرحلكم اللي بيحصل فى الكواليس .. خليكم دايما معانا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
