تفتكر إيه اللي ممكن يخلي مصر ترجع على قمة صناعة النسيج في العالم؟ إزاي أكبر مصنع نسيج في العالم ممكن يغير شكل الاقتصاد المصري؟ وهل ممكن مصنع واحد يساهم في توفير عملة صعبة ويوفر آلاف فرص العمل للشباب؟.. فى الفيديو ده هنتكلم عن تفاصيل تشغيل أكبر مصنع نسيج في العالم المصنع اللي هيكون نقطة تحول كبيرة لصناعة مهمة زي دي في مصر
مصر رسميًا بدأت مرحلة جديدة في صناعة النسيج بإعلان التشغيل التجريبي لأكبر مصنع نسيج في العالم اللي موجود في مدينة المحلة الكبرى عاصمة صناعة الغزل والنسيج.. المصنع ده جزء من خطة طموحة جدًا للدولة المصرية عشان تستعيد ريادتها في مجال كانت دايمًا مميزة فيه على مستوى العالم.. يعنى المصنع ده مش مشروع صناعي وخلاص ده خطوة استراتيجية عشان نرجع بقوة على خريطة الاقتصاد العالمي
المصنع مقام على مساحة 62 ألف متر مربع وبيستخدم أحدث تكنولوجيا في العالم في مجال صناعة الغزل والنسيجوده معناه إننا بنتكلم عن كيان عالمي بكل المقاييس
طيب إيه أهمية المصنع ده؟
أول حاجة المصنع هيشتغل بطاقة إنتاجية يومية 30 طن غزل وده رقم مهول جدًا الإنتاج ده هيتم تصديره للأسواق العالمية وده معناه تدفق عملة صعبة لمصر ودي خطوة حيوية لدعم الاحتياطي النقدي وتحسين وضع الجنيه المصري
تاني حاجة المصنع هيوفر حوالي 12 ألف فرصة عمل مباشرة وغير مباشرة يعني مش بس هيشغل ناس جوه المصنع لكن كمان هيخلق فرص في مجالات زي النقل والتوريد والخدمات اللوجستية
تالت حاجة المصنع هيدعم السوق المحلي بشكل كبير إحنا عارفين إن صناعة الملابس الجاهزة في مصر بتعاني من نقص في المواد الخام المحلية والمصنع ده هيغطي الفجوة دي وهيقلل الاعتماد على الاستيراد، وبالتالي هيوفر فلوس كانت بتخرج من الاقتصاد المصري
واللى لازم تعرفه ان زمان مصر كانت واحدة من الدول الرائدة في صناعة الغزل والنسيج والقطن المصري كان علامة تجارية معروفة عالميًا بجودته لكن مع الأسف خلال السنوات اللي فاتت حصل تراجع في القطاع ده لكن تشغيل المصنع الجديد ده هو رسالة واضحة للعالم “مصر راجعة وبقوة”
الدولة استثمرت حوالي 21 مليار جنيه في تطوير قطاع الغزل والنسيج بالكامل والمصنع ده هو واحد من أكتر من 7 مصانع جديدة بيتم إنشاؤها لتطوير الصناعة دي.. وده معناه إننا مش بنتكلم عن مشروع واحد بس إحنا بنتكلم عن خطة شاملة لإحياء صناعة الغزل والنسيج بالكامل، وإعادة وضع مصر في المقدمة.
و لو بنتكلم عن الاقتصاد فالمصنع ده هيكون ليه دور كبير جدًا.. صناعة النسيج واحدة من أهم الصناعات التصديرية في العالم ومصر عندها ميزة تنافسية قوية بفضل القطن المصري مع تشغيل المصنع مش بس هنصدر منتجاتنا بجودة عالمية لكن كمان هنكون جزء من سلاسل الإمداد العالمية وده معناه إن الاقتصاد المصري هيبقى أكتر اندماجًا مع الاقتصاد العالمي.. غير كده لما نصدر أكتر هنكسب عملة صعبة أكتر وده هيخفف الضغط على الجنيه، وهيحسن وضع الاقتصاد المحلي بشكل عام
اجمالا المصنع ده هو خطوة البداية في خطة طموحة لاستعادة ريادتنا في صناعة النسيج وفتح أبواب جديدة للشباب ودعم الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
