هو ليه بنقول إن سنة 2025 هتكون سنة نهاية الأزمات الاقتصادية وسنة هيحصل فيها انطلاقة اقتصادية كبيرة.
سنة 2024 مرت بحلوها ومرها ومصر استقبلت سنة جديدة ومنتظر فيها أحداث اقتصادية كبيرة وكتيرة على مختلف القطاعات الاقتصادية وخاصة القطاعات اللي ليها علاقة بالدولار.
وأول القطاعات دي هي قطاع السياحة واللي هيكون القطاع الجوكر في 2025 لانه داخل على إنطلاقة جديدة مع افتتاح أهم 3 مشروعات سياحية في تاريخ مصر واللي هتعزز قوة مصر الناعمة وتعزز مكانتها الثقافية وفي نفس الوقت مضاعفة إيرادات السياحة واول مشروع هو افتتاح مشروع المتحف المصري الكبير واللي كلف مليار ونص دولار واللي العالم كله مستنية لانه المشروع الثقافي الاعظم في الدنيا واللي خد جايزة أهم مشروع عالمي والرئيس السيسي دعا بنفسه عدد كبير من قادة وملوك العالم لحضور الافتتاح واللي غالبا هيكون ما بين مايو ويوليو اللي جايين وهيعرض أهم كنوز الحضارة الفرعونية واكتر من 5 آلاف قطعة من آثار الملك الذهبي توت عنخ امون وهو الحدث اللي شركات الطيران والسياحة والسفر العالمية مستنياه بفارغ الصبر.
تاني مشروع سياحي هيتم افتتاحه في 2025 هو مشروع التجلي الاعظم بشمال سيناء واللي هينقل السياحة الدينية لمستوى تاني من كل أنحاء العالم دا غير تطوير المنطقة كلها واللي هيزود من تدفقات السياحة.
أما تالت مشروع متوقع افتتاحه في 2025 فهو مشروع تطوير القاهره الفاطمية وحدائق الفسطاط واللي هتغير موازين السياحة في مصر مع جمال المنطقة وإعادة الآثار الإسلامية لمجدها.
ونروح للقطاع الزراعي وهو من أهم قطاعات الاقتصاد المصري واللي بعد كام شهر من دلوقتي هيتم افتتاح مشروع الدلتا الجديدة، اللي بيعتبر قفزة كبيرة لتنفيذ استراتيجية الزراعة 2030 وبتوصل إجمالي مساحته 2.2 مليون فدان، كما أن المساحة المنزرعة والمستهدف زراعتها تعادل ما يقرب من 30% من مساحة الدلتا القديمة، بحسب وزير الزراعة ومشروع الدلتا الجديدة وصفه الخبراء إنه سلة غذاء مصرية كبيرة تتسع لحجم مصر، وتستطيع من خلالها التصدير للخارج.
وعلى مستوى السياسة النقدية فمصر داخلة على عهد تخفيض سعر الفايدة واستقرار سعر الدولار مع زيادة تدفقات الدولار في 2025 من كل القطاعات الاقتصادية ومنها السياحة زي ماقلنا ومن قناة السويس واللي متوقع تسترد قوتها في السنة الجديدة وخاصة مع افتتاح مشروع الازدواج الملاحي في القطاع الجنوبي وكمان مع تسديد مصر لديونها في 2025 واللي بتقدر ب22.4 مليار دولار وهي تاني أكبر سنة هتسدد فيها ديون بعد 38 مليار دولار سددتها الحكومة في 2024 والاقساط هتكون أقل بكتير في السنين الجاية ودا هيزود معروض الدولار في سوق الصرف.
كمان سنة 2055 هتشهد صفقات استحواذ ضخمة خاصة في شركات الأغذية واللي بتضم 27 ألف شركة أغذية تعمل تحت مظلة غرفة الصناعات الغذائية باتحاد الصناعات بحجم استثمارات يقترب من 500 مليار جنيه، وتوقع الخبراء استحواذ الصناعات الغذائية المصرية على 25% من الاستثمارات الأجنبية المباشرة المتوقع استقطابها لمصر خلال عام 2025 ودا غير 15 مليار دولار منتظر تحقيقها من الاستثمار الأجنبي المباشر خلال العام المالي 2024/2025 بحسب الرئيس التنفيذي للهيئة العامة للاستثمار والمناطق الحرة وكل اللي قلناه دا مجرد أمثلة ولسه معانا قطاعات تانية كتير هتقفز في السنة الجديدة زي الصناعة والنقل والمواني والتصدير والتعهيد ودا كله هينعكس طبعا على معدلات النمو والتنمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
