يا ترى ايه الخدمات اللى بتقدمها البنوك للفلاح المصري عشان يحافظ على أرضه وسط التحديات الصعبة اللى بيمر بيها الاقتصاد؟ وايه مبادرات التمويل اللى تم الاعن عنها السنين اللى فاتت ودعمت الفلاح بشكل مباشر؟ وإزاي المبادرات بتساعد المزارعين يطوروا أراضيهم ويزودوا إنتاجهم؟
في بلد زي مصر الزراعة مش مجرد مهنة دي حياة ملايين المزارعين والفلاحين اللي بيشتغلوا ليل نهار عشان يضمنوا أكلنا وشربنا.. لكن مع التحديات الاقتصادية الفلاح المصري محتاج دعم مش بس مادي.. محتاج تمويل يساعده يطور أرضه ويواجه تكاليف الزراعة ويزود إنتاجيته.. وهنا بيجي دور البنوك المصرية اللي بتحاول تخلق حلول ومبادرات تمويلية عشان تقف في ضهر الفلاح وتساعد القطاع الزراعي يفضل قوي ومستدام.
البنوك المصرية بالتعاون مع الدولة أطلقت مبادرات كتير لدعم الفلاحين والمزارعين.. مبادرات مش بس بتركز على القروض لكنها بتقدم تسهيلات بتراعي ظروف الفلاحين وتساعدهم يواجهوا تحديات الزراعة .
وخلونا نستعرض المبادرات دي.. ونشوف إزاي بتأثر على حياة الفلاحين.. وأول مبادرة هي مبادرة التمويل الزراعي بفائدة منخفضة.. البنك المركزي المصري أطلق مبادرة بفائدة بسيطة جداً 5% فقط، لتمويل المشاريع الزراعية الصغيرة.. المبادرة دي بتساعد الفلاحين يحصلوا على قروض يقدروا يستخدموها في شراء معدات حديثة أو بذور وأسمدة أو حتى تطوير أنظمة الري.
كمان كان فيه قروض ميسرة للمشاريع الزراعية.. كتير من البنوك زي البنك الزراعي المصري بيوفر برامج تمويلية ميسّرة..و القروض دي بتدي الفلاح فرصة يشتغل على زراعة المحاصيل اللي محتاجة تكلفة أولية كبيرة.. زي القمح والذرة وقصب السكر.
وخد بالك البنوك مش بس بتركز على المحاصيل الزراعية.. لكنها كمان بتدعم الفلاحين اللي شغالين في تربية المواشي والدواجن.. من خلال مبادرة إحياء البتلو اللي بتوفر قروض بفوايد مخفضة لتربية العجول وتسمينها عشان تزود الإنتاج المحلي من اللحوم.
ومع تغيرات المناخ اللى العالم كله بقا بيعاني منها.. البنوك بتدعم المزارعين في التحول لأنظمة زراعة مستدامة وصديقة للبيئة زي الري بالتنقيط والطاقة الشمسية.. بنط زي البنك الأهلي المصري مثلاً أطلق برامج لتمويل مشاريع الطاقة الشمسية اللي بتساعد الفلاح يقلل تكاليف الكهرباء ويوفر ميه لري أراضيه.
طب وايه التيسيرات اللى بتقدمها البنوك للفلاح؟
التيسيرات دي بتتم من فى كذا حاجة زي .. تسهيلات السداد لأن القروض الزراعية بتيجي بشروط سداد مرنة تناسب طبيعة عمل الفلاح اللي بيستنى موسم الحصاد عشان يحقق دخل.. كمان فيه بعض المبادرات اللي بتقدم تمويل عشان يقدر الفلاح يشتري معدات حديثة تساعده يزود إنتاجه بأقل تكلفو والبنوك بتوفر استشارات مالية للفلاحين عشان يعرفوا إزاي يديروا القروض ويستغلوها بطريقة صحيحة.
دعم الزراعة مش بس بيساعد الفلاحين.. ده كمان بيأثر إيجابياً على الاقتصاد كله.. لأن الزراعة بتشكل حوالي 15% من الناتج المحلي الإجمالي لمصر ودعمها بيزود الإنتاج المحلي ويقلل استيراد المحاصيل من برة.. وده كمان بيخلق فرص عمل في القرى والمناطق الريفية، وبيساعد على تحسين مستوى المعيشة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
