يا ترى ليه فجأة بعض البنوك الكبيرة زي البنك الأهلي المصري وبنك مصر بدأوا يخفضوا فائدة الشهادات الدولارية؟ هل القرار ده ليه علاقة بالاقتصاد العالمي؟ ولا في أسباب تانية مخفية ورا الكواليس؟ وهل اللى بيحصل ده ليه علاقة بأزمة شح العملة الأجنبية؟ وهل هيكون ليه تأثير على أموال المودعين؟
فى الـ 48 ساعة الأخيرة البنوك الكبيرة في مصر زي البنك الأهلي المصري وبنك مصر خفضوا فوايد الشهادات الدولارية..
في بنك مصر مثلا إدارة البنك قررت تخفيض سعر الفائدة على شهادة القمة الدولارية ذات العائد الشهري بالجنيه المصري من 9 % إلى 8.5% وعلى شهادة إيليت ذات العائد الشهري بالدولار من 7% إلى 6.5% وطبعا ده على الشهادات الجديدة مش على الشهادات القائمة بالفعل.
كمان البنك الأهلي المصري قرر تخفيض العائد على شهادات الأهلي فورا والأهلي بلس بواقع 0.5% على الترتيل
طبعاً أول سؤال هييجي في بال أي حد هو إيه اللي بيحصل في السوق المصري والعالمي اللي خلاهم ياخدوا الخطوة دي؟ وليه دلوقتي؟
الحقيقة الأسباب كتيرة ومتعددة ..أول حاجة لازم نبص عليها هي الاقتصاد العالمي.. وحاليا الفايدة على العملات الأجنبية زي الدولار بقت في مستويات منخفضة في كتير من البنوك المركزية حول العالم.. فالبنوك المصرية بتحاول تعدل أسعار الفايدة عندها بما يتناسب مع التغيرات دي.. يعني مثلاً لو الفايدة على الدولار في أمريكا بدأت تقل البنوك هنا في مصر مش هتقدر تفضل مدياك فوايد عالية على الشهادات الدولارية، وإلا هتخسر.
طب هل ده السبب الوحيد يعني؟
لا طبعا ..مش السبب الوحيد. فيه عوامل تانية مرتبطة بالوضع الاقتصادي في مصر نفسها..و البنك المركزي المصري بدأ يتجه لسياسات نقدية بتدور حوالين تثبيت أو تقليل معدلات الفايدة المحلية عشان يقلل التضخم ويشجع الاستثمار.. فالبنوك الكبيرة زي البنك الأهلي وبنك مصر ممكن يكونوا بيتماشوا مع السياسة دي عشان يحافظوا على التوازن في السوق.
طب هل ده معناه إن في حاجة غلط في الاقتصاد المصري؟
اللي بيحصل دلوقتي هو نوع من إعادة التوازن.. أصلا الفايدة على الشهادات الدولارية كانت في مستويات عالية جداً لفترة وده كان نتيجة الأزمات اللي مر بيها الاقتصاد العالمي زي كورونا والتوترات السياسية.. لكن دلوقتي الأمور بدأت تهدى شوية والبنوك بتحاول تتكيف مع الوضع الجديد.. والهدف الأساسي هنا هو إنهم يحافظوا على استقرار السوق ويشجعوا الاستثمار في الجنيه المصري بدل الاعتماد الكلي على الدولار.
" والناس اللي معاها شهادات دولارية هيتأثروا إزاي؟
الحقيقة إن خفض الفايدة على الشهادات الدولارية ممكن يخلي الناس تفكر أكتر في تحويل استثماراتهم للجنيه المصري.. وده في حد ذاته هدف من أهداف البنوك..و الحكومة المصرية بتسعى لدعم الاقتصاد المحلي وتشجيع الناس على الاستثمار في الجنيه خصوصاً إن في أدوات تانية بتقدم فوايد كويسة على الجنيه المصري، زي الشهادات بالجنيه أو حتى الاستثمار في العقارات والأسهم
وخد بالك قرار التخفيذ زي ما قولنا فى البداية هيتم تطبيقه على الشهادات الجديدة مش القديمة يعنى اللى معاه شهادات قديمة هياخد نفس الفايدة اللى اتفق عليها مع البنك
معنى كده انه ممكن يكون فيه تخفيض تاني على اسعار فايدة الشهادات الدولارية؟
المؤكد ان البنوك هتفضل تراقب الوضع المحلي والعالمي عشان تقدر تاحد قرارات سليمة.. و ممكن نشوف مزيد من التغييرات في أسعار الفايدة على الشهادات الدولارية أو حتى منتجات تانية..و الحكومة والبنوك شغالين على توازن السوق وإنهم يضمنوا إن الفوايد اللي بتتقدم تكون منطقية ومتوافقة مع الاقتصاد الحالي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
