إيه قصة الزيادة الجديدة اللي شركات الاتصالات بتفكر تطبقها على كروت الشحن وباقات الإنترنت، وليه الشركات قررت تاخد القرار ده، وإيه هي آليات التنفيذ وامته، وهل الموضوع له علاقة بتحسن سرعة الإنترنت ولا زيادة وخلاص.. هنقولك كل التفاصيل في الفيديو ده فتابعنا للآخر.
في الساعات الأخيرة، طلع رئيس الجهاز القومي لتنظيم الاتصالات، محمد شمروخ، وقال إن هيحصل زيادة في أسعار خدمات الاتصالات خلال الفترة الجاية، وأكد إن الموضوع ده حتمي وواجب ومافيش كلام فيه.
عشان كده، شركات المحمول اللي شغالة في مصر، أعلنت أنها كان عندها مطلب من شهور قدمته للجهاز القومي لتنظيم الاتصالات، عشان يسمح لهم برفع أسعار خدماتها اللي بتشمل كروت الشحن وباقات الإنترنت، وده بعد ما حصل زيادة لأسعار الوقود، وتحرير سعر صرف الجنيه.
والكلام ده الجهاز برره، إن بارتفاع أسعار الطاقة اللي رفعت التكلفة التشغيلية على الشركات الشغالة في قطاع الاتصالات، وبالتالي الأسعار هتزيد هتزيد، لكن رئيس الجهاز أكد إن القرار ده هدفه ضمان تقديم الخدمات بالشكل اللي بيليق بالمواطن المصري، لأن شركات الاتصالات بتعتمد على السولار والمازوت عشان تشغل أبراج المحمول بتاعتها الموجودة في كل محافظات الجمهورية.
والكلام عن زيادة أسعار باقات النت وكروت الشحن، جه بالتزامن مع إطلاق الجيل الخامس للمحمول، لأن امبارح الدكتور عمرو طلعت، وزير الاتصالات وتكنولوجيا المعلومات، شهد توقيع منح ترخيص تشغيل خدمات الجيل الخامس للتليفون المحمول بين الجهاز القومي لتنظيم الاتصالات، وشركات المحمول في مصر؛ زي أورانچ وڤودافون وإي آند مصر اللي هي اتصالات.
ووصل إجمالي قيمة تراخيص تشغيل شبكات الجيل الخامس للتليفون المحمول الممنوحة للشركات الأربعة حوالي 675 مليون دولار، وده مقابل تراخيص الجيل الخامس وتجديد رخص الأجيال السابقة لمدة 15 سنة.
وعشان تعرف هتستفيد إزاي من تشغيل خدمات الجيل الخامس، فهي هتنعكس بالإيجاب على سرعات الإنترنت وكمان الاقتصاد القومي، ومش بس كده لأ ده كمان على ترتيب مصر في المؤشرات الدولية في قطاع الاتصالات وتكنولوجيا المعلومات، باعتبارها إحدى الركائز الأساسية في تعزيز البنية الرقمية للدولة
كمان، تقنيات الجيل الخامس هيساهم بسكل كبير في تحقيق التحول الرقمي، عشان هيتيح لشبكات الجيل الخامس سرعات فائقة تدفع عملية التحول الرقمي وتحقق رؤية مصر لأهداف التنمية، كمان بتُعتبر تقنيات الجيل الخامس عامل محوري في تعزيز وتوسيع خدمات إنترنت الأشياء، واللي بيعتبر من أهم ركائز الثورة الصناعية الرابعة، عشان بيشغل منظومات المدن الذكية والخدمات الرقمية بقطاعات الدولة المختلفة.
يعني نقدر نقول، إن إطلاق خدمات الجيل الخامس في مصر هي خطوة مهمة جدا لتعزيز قدرات سوق الاتصالات، وبتعكس التزام الدولة بتوفير أحدث التقنيات وتقديم خدمات مبتكرة للمستخدمين، زي اتصالات متطورة تواكب المعايير الدولية، وتعزز مكانة مصر كمركز إقليمي رائد في تقديم التكنولوجيا المتقدمة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
