سمعنا كتير عن مشروعات ربط كهربائي بين مصر ودول كتيرة، وان مصر هتتحول لمركز اقليمي لتبادل الطاقة، وازاي الموضوع ده هيحصل أحنا عندنا ازمة في الكهرباء والكهرباء كانت بتقطع بالساعات.. لو عايز تعرف ده هيتم أزاي شوف الفيديو ده للاخر.
في الايام اللي فاتت سمعنا كلام كتير عن مشروعات ربط كهربائي مع السعودية وقبرص واليونان والسودان وليبيا، ودول تانية لسه هتظهر في الفترة اللي جاية، وان مصر هتتحول لمركز اقليمي لتبادل الطاقة بين كل قارات العالم.
طبعا السؤال اللي جه في دماغك حاليا، أزاي الحكومة هتعمل الكلام ده وأحنا من كام شهر بس كانت الكهرباء بتقطع بالساعات وفي البداية كانت بتقطع ساعة وبعدين بقيت ساعتين وفي الأخر كانت بتوصل لاكثر من كده بكتير وكل ما تسال عن السبب يقولك تخفيف احمال، واللي كان بسبب الكهرباء بتقطع علي كل محافظات الجمهورية.
طيب ازاي مصر هتتحول لمركز اقليمي لتبادل الطاقة بين الدول؟.
في السنين اللي فاتت مصر عملت بنية تحتية كبيرة جدا في كل المجالات، وخصوصا في قطاع الكهرباء واللي فعلا شهد تشييد محطات كبيرة جدا سواء كانت شغالة بالمواد العادية زي المازوت والغاز الطبيعي أو اللي شغالة بالطاقة النظيفة سواء كانت رياح او اشعة شمس، ولا البنية التحتية دي كانت مصر مش هتوصل للتقدم العمراني والاقتصادي اللي موجودة عليه حاليا.
الكلام اللي سمعته ده حقيقي وفعلا مصر هتتحول لمركز اقليمي لتبادل الطاقة وهتبقي من أكبر دول العالم في تصدير الطاقة لكل دول العالم، وده هيتم من خلال مشاريع الربط الكهربائي اللي بتعملها الدولة حاليا مع دول الجوار زي السعودية واللي مصر هتصدر من خلالها كهرباء لدول الخليج وقارة اسيا وقبرص واليونان واللي مصر هتصدر من خلالهم كهرباء لدول قارة أوروبا والربط الكهرباء اللي هيكون مع السودان واللي من خلالها هنصدر كهرباء لدول جنوب قارة أفريقيا، والربط الكهرباء من ليبيا واللي من خلالها هنصدر كهرباء لدول المشرق العربي .
في اليومين اللي فاتوا وزارة الكهرباء والطاقة المتجددة قدمت خطة عمل لمجلس الوزراء لاستراتيجية الطاقة 2040، واللي بتضمن زيادة مساهمة الطاقة المتجددة علي الشبكة الموحدة للكهرباء لـ60% من اجمالي الطاقة المستهلكة محاليا، وده ضمن خطة الدولة لبناء شبكة قوية ومرنة وآمنة تستوعب القدرات التوليدية وتحقق الاستقرار والاستمرارية للتغذية الكهربائية .
الخطة اللي قدمتها وزارة الكهرباء والطاقة المتجددة لمجلس الوزراء بتستهدف الوصول بنسبة مساهمة الطاقة المتجددة إلى 60% فى مزيج الطاقة، هيكون منها أكثر من 65 جيجاوات من طاقتى الرياح والشمس ، و2.4 جيجاوات من مشروعات الضخ والتخزين ، و2 جيجاوات من مشروعات الطاقة الكهرومائية و4.8 جيجاوات من الطاقة النووية، ده غير استخدام الهيدروجين الأخضر وخفض الإعتماد على الطاقة التقليدية واستخدام الوقود الأحفورى و تخفيض أكثر من 19 جيجاوات من التربينات التقليدية اللي بتعتمد على الوقود الأحفورى علشان توصل لـ49 جيجاوات .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
