الأوضاع الاقتصادية الأخيرة غيرت فينا حاجات كتير ومنها ازاي ندير مدخراتنا أو الحصول على فرصة للاستثمار من الصفر وعمل دخل وثروة تغير الظروف المعيشية الصعبة.. تعالى نشوف خبراء الاقتصاد بينصحوا بايه دلوقتي.. خليكم معانا للآخر وهتعرفوا التفاصيل.
زي ما احنا عارفين فيه انواع كتير من الاستثمارات اللي ممكن نشغل فيها الفلوس الزيادة زي الدهب والعقارات والبورصة والأسهم وشهادات الادخار والمصريين بقوا خبراء الحقيقة في الأمور الاقتصادية ودا بسبب التطورات الأخيرة في السنتين اللي فاتوا واضطر اغلب المواطنين يدوروا على أفضل وسيلة لتشغيل المدخرات أو الفلوس الزيادة ودا بعت انخفاض قيمة الجنيه وبالتالي اي تكنيز الفلوس تحت البلاطة بيضيع قيمتها وييعرضها للخسارة.
رجال الأعمال وخبراء الاقتصاد شايفين أن كل نوع من الاستثمار اللي قلنا عليه فيه عيوب ومميزات زي الدهب مثلا واللي بيعتبر استثمار مثالي في أي وقت بسبب ارتفاع قيمة الدهب على الدوام لكن مشكلته انك محتاج تخزنه أكبر فترة ممكنة وتتابع السوق عشان تقدر تبيع في الوقت المناسب وميزة الاستثمار في المعدن الأصفر أنه بيحتفظ بقيمة الفلوس وفي نفس الوقت بتحقق مكسب مضمون لكن ممكن يحصل عندك اي ظرف وتضطر تبيع الدهب بأس سعر وهنا ممكن تخسر فيه بسبب المصنعية واعتباره دهب مستعمل.
كمان الاستثمار في العقار فيه مخاطر كتير منها أنه استثمار مرهق ومحتاج إجراءات كتيرة وأوراق ومستندات ومحامين وغير أن السوق ممكن يقلب في لحظة وشفنا في الأيام الأخيرة خبراء سوق العقارات بيحذروا من فقاعة عقارية تنهار معاها الأسعار ورغم أن الأنباء دي مش اكيده ومجرد توقعات لكن ناس كتير خافت واضطرت تبيع بسرعة وكمان الاستثمار في شهادات الادخار ليه اكتر من ميزة منها أنه استثمار آمن ومضمون بضمان البنك المركزي المصري وفي نفس الوقت مش محتاج جهد ومشقة ومكسبه معروف كل شهر واللي بيحط فلوسه عارف حاطط كام وهياخد عليهم فوائد كام لكن مشكلته إن الفلوس بتفضل محجوزة في البنك ولو فكرت تكسر الشهادة هتخسر جزء من فلوسك.
طيب ايه الاستثمار اللي الخبراء أجمعوا إنه الافضل دلوقتي ؟
شوف لو عاوز تشغل فلوسك وتكون في نفس الوقت قدام عينيك وتقدر تتحكم فيها وكمان تكسب بشكل يومي أو شهري وتقدر توسع الاستثمار في أي وقت أو تاخد فلوسك يبقي مش قدامك غير انك تعمل مشروعك الخاص في حاجة بتفهم فيها وبكده يبقي انت قدام فرصة تبقي رجل أعمال مهما كان المشروع صغير في بدايته لكن انت بتخوض مغامرة خاضها كل مليارديرات العالم اللي بدأو بمشروعات صغيرة ومحدش كان متخيل أنهم هيكونوا أصحاب اكبر ثروات في العالم .. وميزة المشروع الخاص انك بتكرس له كل تركيزك وبتحاول توسعه وتكبره غير انك بتكون متابع نشاطك على مدار الساعة والمكسب بيغريك انك توسع نشاطك والجنيه بيجيب جنيه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
