كشف عمر مهران، والد الطالب ضحية مدرسة بورسعيد، تفاصيل مقتل نجله بعد أن طعنه أحد زملائه بسلاح أبيض داخل المدرسة.
وقال مهران، في مداخلة مع برنامج "صالة التحرير" المذاع على قناة "صدى البلد": "كنت أنا ووالدته في مشوار، وجالنا تليفون من واحد صاحبه ابنك متعور في المستشفى، وجريت على المستشفى وكان ابني في غيبوبة وسألت هو ماله قالوا البقاء لله".
وأضاف: "مكانش صاحبه ولا حاجة هو كان معاه في المدرسة، وفي أول الدراسة هو ضربة بالخوذة على دماغه وابني ضربه بالخوذة، وقاله متهزش معايا، والمدرسين اتدخلوا وانتهى الموضوع على كده".
وتابع: "الولد نزل خلى ابني واقف في الحوش، وراح رايح لابني وبيشده من التشيرت وابني قاله متهزرش معايا وراح ضربه بالمطوة، مش عارف مدرسة إزاي وشاب يدخل بالمطوة".
وأكمل: "كل الطلاب كانوا موجودين في الحوش والمدرب اللي المفروض يبقى معاهم كان مفروض يبقي معاهم برة، ولكن ولا في مدرس ولا حاجة وابني كان بيموت والمدرسين واقفين يتفرجوا عليه ومعاهم العربيات، ومحدش عايز ياخده في عربية وخده مدرس وسابه قبل المستشفى بـ50 متر ونزله هو وأصحابه وسابه ومشي".
وواصل: "الولد فتح المطوة وضربه، أنت رايح تلحق طفل عندك في المستشفى توديه المستشفى خفت تتحمل المسؤولية في ايه؟ لو ربنا اداني عمر في الدنيا ولو الولد اللي موت ابني متعلقشي، دا وحيد على تلات بنات".
