هو الدولار رجع يزيد ويرفع تاني ليه في الأيام الأخيرة وهل الزيادة دي هتستمر وايه لغز التحركات في الأسعار رغم تقارير صندوق النقد الدولي ووكالة فيتش بارتفاع التدفقات الدولارية.. كل ده هنعرفه مع حضراتكم في التقرير ده خليكم معانا للآخر وهتعرفوا التفاصيل
كلنا متابعين طبعا اللي بيحصل دلوقتي في سوق الصرف وارتفاع أسعار الدولار على مدار الأيام اللي فاتت وتخطيه لحاجز ال49و 20 وقرش بعد ما كان مستقر في مربع ال48 جنيه وأقل كمان والغريب أن الزيادة دي جت ورا بعض بمعنى أن سعر الدولار مرفعش ورجع ينزل تاني زي ما اتعودنا من ساعة قرار التعويم في مارس اللي فات وبقي دلوقتي بيصعد من غير نزول والأغرب إن سعر العملة الأمريكية بترفع أمام الجنيه بالتزامن مع تقارير دولية صدرت من وكالة فيتش للتصنيف الائتماني وصندوق النقد الدولي بارتفاع التدفقات النقدية الأجنبية من اكتر من مورد واهمها الاستثمار وصفقة رأس الحكمة والدعم السعودي الأخير وبرامج التمويل من صندوق النقد والاتحاد الأوروبي.. طيب إيه السر في ارتفاع الدولار.
الموضوع مش لغز ولا حاجة ولو ركزنا شوية هتلاقي سبب معقول جدا لارتفاع سعر الدولار وهو قرار البنك المركزي أو توجيهاته للبنوك بتوفير الدولار للمستوردين لاستيراد السلع الاستفزازية أو الكمالية اللي سبق وحظر استيرادها مع اشتداد أزمة نقص الدولار وظهور السوق السودا للعملة وطبعا فتح باب الاستيراد ل13 سلعة كانت محظورة وعلى رأسها السيارات أكيد رفع الطلب والسحب على الدولار في الأيام الأخيرة والطلب زاد على العملة الأجنبية وبالتالي طبيعي سعر العملة الأمريكية يزيد ودا لأن البنك المركزي المصري ملتزم بسياسة العرض والطلب والسعر المرن في أسواق صرف العملات وفي مقدمتها الدولار.
طيب ايه مصير الدولار دلوقتي وسعر العملة رايح على فين ؟
اكيد طول ما فيه طلب على الدولار السعر هيستمر في الزيادة لغاية ما الطلب يرجع يقل ويقابله زيادة في المعروض النقدي من الدولار والمسألة مسألة وقت ووقت قصير وبعدها الدولار هيرحع لحالة الطبيعية خاصة لو عرفنا أن سوق زي سوق السيارات مثلاً واقف من فترة كبيرة بسبب قرار حظر الاستيراد واكيد الطلب على الدولار زاد جدا عشان المستوردين يلحقوا يستورود السيارات لتلبية الطلب على السوق ودا غير بقية السلع التانية اللي كانت في قايمة الحظر.
فيه دلالة مهمة جدا من قرار رفع حظر الاستيراد على السلع دي وهي قدرة وقوة الأرصدة الدولارية في البنوك وإلا مكنتش هتصرف دولارات للمستوردين زي ما كان بيحصل قبل كده واكيد الحكومة عاملة حسابها في وصول تدفقات دولارية جديدة من النقد الأجنبي تقدر توازن بيه سعر الصرف خلال أيام قليلة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
