هو ليه فيه حالة تفاؤل في الشرق الأوسط وخاصة مصر بفوز ترامب في الانتخابات الأمريكية وايه قصة مليارات الدولارات اللي هترجع مصر بعد فوزه .. خليكم معانا للآخر وهتعرفوا التفاصيل في التقرير التالي.
انتهى مارثون الانتخابات الأمريكية وفاز ترامب وفيه انقسام عالمي على فوزه وفيه دول متخوفة منه زي الصين والمكسيك وحتى أوروبا حليفة الولايات المتحدة التقليدية ودا من طريقة حكمه الغريبة وفيه فريق تاني متفائل بفوز ترامب وهي دول الشرق الأوسط وخاصة مصر والتفاؤل دا ناتج من تعهد ترامب قبل الانتخابات بإنهاء الصراع في الشرق الأوسط وهو قادر يعمل دا واكيد هيتحمس إنه ينهي اشرس حرب وأكبر مأساة إنسانية في العالم ودا لأن حل الأزمة هيديه قوة عالمية باعتباره الرجل القوي اللي انهي الصراع في المنطقة ونجح في اللي فشل فيه سلفه بايدن على مدار اكتر من سنة.
كل المؤشرات بتقول إن الرئيس الأمريكي الجديد ناوي فعلا يوقف الصراع في المنطقة ويرجع الهدوء من تاني ودا اللي يفرق مع مصر كتير جدا لأن وقف الصراع في الشرق الأوسط معناه عودة الملاحة لقوتها في قناة السويس وعودة مليارات الدولارات اللي فقدتها القناة بسبب الحرب وتغيير السفن لمساراتها بعيد عن قناة السويس وزي ما احنا عارفين إن قناه السويس خسرت حوالي 70% من إيراداتها بسبب الأزمة فالمنطقة دا غير إن عودة الملاحة لقناة السويس معناه أنها هتحقق أرقام قياسية كبيرة بسبب حالة الزحام اللي هتكون في قناة السويس لأن المسارات البديلة كبدت شركات النقل البحرية الدولية مليارات الدولارات كخسائر بسبب زيادة كلفة النقل في المسارات البديلة للقناة المصرية.
كمان مصر هتكسب من عودة الاستقرار في المنطقة من ناحية السياحة واللي متوقع تحقق ارقام قياسية في موسم الشتاء الحالي مع الطفرة في المشروعات السياحية والفندقية وهتسهل وصول مصر لرقم 30 مليون سائح في السنة وبالتالي مليارات الدولارات الإضافية اللي هتدخل خزينة الدولة ودا غير إن عودة الهدوء للمنطقة هينعش ملف الاستثمارات في مصر بشكل أكبر من كده بكتير.. ودا على مستوى الاقتصاد المصري واللي كمان هيستفاد من ناحية تانية وهي إن عودة الاستقرار بالمنطقة معناه عودة الاستقرار للأسواق العالمية والاسعار الدولية ومصر بتستورد فاتورة ضخمة من الخارج واي انخفاض في أسعار السلع والبترول عالميا هيوفر على مصر مليارات الدولارات في السنة.
كل اللي قلناه دا معناه أن مصر هيكون عندها فرص كتيرة لزيادة التدفقات الدولارية بشكل ضخم ودا طبعا هينعكس على أسعار الدولار والصرف في مصر واللي بدورها هتاثر على أسعار السلع المحلية بشكل كبير وسعرها هينزل مع هبوط الدولار المتوقع في السوق المحلية.. وعلى العموم الايام الجاية هي اللي هتكشف ترامب ناوي على إيه في المنطقة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
