هيصدر لأوروبا.. حكاية أكبر مجمع للأثاث بيتعمل في العلمين الجديدة

إيه حكاية أكبر مجمع لصناعة الأثاث في العلمين الجديدة، ومساحته هتبقى قد إيه، وهل الحكومة بدأت فيه ولا لسه، ومتوقع حجم إنتاجه يكون قد إيه، وامته هنشوفه بيكفي السوق المحلي وبنصدر منه للخارج كمان.. كل التفاصيل دي هتعرفوها في التقرير.. خليكم معانا للآخر

الحكاية بدأت من 24 ساعة، لما المهندس حسن الخطيب وزير الاستثمار والتجارة الخارجية، اجتمع مع داريك كروبا رئيس مجلس إدارة شركة PADMA البولندية لتصنيع الأثاث المنزلي، وأحمد مجدي الرئيس التنفيذي للشركة في مصر، وده كان بهدف بحث خطة الشركة لإنشاء مجمع صناعي لإنتاج الأثاث في مدينة العلمين الجديدة باستثمارات بتوصل ل 70 مليون يورو.

وعلشان نبقي عارفين شركة PADMA البولندية دي من أكبر شركات الاثاث في العالم وأوروبا وأنها تعمل مجمع صناعي هنا في مصر دا معناه أن الشركة عندها خطط كبيرة في السوق المصري وأنها ناوية تستفيد من موقع مصر الجغرافي والامكانيات اللي عندها في المواني والبنية الأساسية عشان تصدر كمان لأفريقيا وأسواق جديدة في المنطقة ودا معناه أن المجمع الصناعي دا مجرد بداية بس لاستثمارات تانية الشركة ناوية تصخها في مصر.

ومن هنا، أكد وزير الاستثمار، استعداد الوزارة لتقديم كل الدعم الممكن للشركة البولندية، عشان تبدأ في المشروع خلال فترة وجيزة جدا، وكمان أشاد باختيار مدينة العلمين الجديدة كانطلاقة لمزيد من الاستثمارات والمشروعات المستقبلية للشركة في مصر، لأنها طبعا بتعتبر من أهم المدن الواعدة في مجالات الاستثمار والصناعة والسياحة.

كمان، الحكومة المصرية شغالة  حاليا على تنفيذ إصلاحات للسياسات المالية والنقدية والتجارية، عشان تجذب الاستثمارات المحلية والأجنبية، وتزود الصادرات المصرية للأسواق الخارجية، كل ده بجانب تيسير حركة التجارة الخارجية لمصر.

ونقدر نقول، إن السوق المصري بيمتلك مقومات وإمكانات استثمارية كتيرة ومتميزة، واللي بتؤهله طبعا لجذب المزيد من الاستثمارات العالمية، واللي بتشمل توافر العمالة المؤهلة، والكوادر الهندسية المتميزة، بالإضافة إلى تنافسية الأجور.

وبعد الكلام ده، داريك كروبا رئيس الشركة البولندية، أشاد بالجهود والدعم اللي فتقدمه الحكومة المصرية لمجتمع الأعمال والمستثمرين الأجانب، وأكد أنه حصل بالفعل البدء في الأعمال الإنشائية للمجمع الصناعي لتصنيع الأثاث بمدينة العلمين الجديدة، واللي بتبلغ المساحة الإجمالية للمشروع 400 ألف متر، وأكد كمان إن الشركة الآن مستعدة تدرب العمالة الفنية وترفع كفاءتها تمهيدا لعملية الإنتاج.

أما موعد بدء عملية التصنيع، هتكون خلال الربع الأول من سنة 2026، والمصنع ده هيكفي السوق المحلي وكمان هنقدر نصدر للخارج بنسبة 100% وخاصة في أسواق أوروبا وأمريكا، لأن المشروع ده بيستهدف صادرات سنوية بحوالي 250 مليون يورو.

ضيف على ده، إن حجم الاستثمارات في المشروع هي 70 مليون يورو كمرحلة أولى، بنسبة مكون محلي تبدأ من 40%، وهتوصل ل 80% خلال ال 5 سنين الجاية لحد ما تبقى 100% مصرية.
ومش عاوزين ننسى أن المجمع البولندي الجديد لصناعة الأثاث هيكون جزء من خطة كبيرة لتحويل لمصر لمركز لتصدير الأثاث في المنطقة بعد اكتمال كل اللمسات في مدينة الاثاث المتطورة والجديدة في دمياط واللي اتعملت بتوجيهات مباشره من الرئيس السيسي للنهوض بيها من حرفة لصناعة ضخمة تعزو الأسواق العالمية.