تحدث النجم المصري محمد صلاح لاعب ليفربول الإنجليزي، عن بداية مسيرته في أوروبا، والانتقال إلى بازل، وكذلك تجربته مع نادي تشيلسي، ويستعرض موقع تحيا مصر أبرز ما جاء على لسان محمد صلاح.
تصريحات محمد صلاح
قال محمد صلاح: “وانا رايح بازل بدأت اشوف اللاعب الأوروبي بيعمل ايه ، لان في فرق بين مصر والناس برا ، بدأت افهم واشوف بيعملو كدة ليه وناجحين ليه ، لقيته بيروح التمرين بدري وبيعمل ريكفري وبعدها يتمرن وبعدها يرجع يروح الجيم”.
وتابع خلال تواجده في معرض الشارقة الدولي للكتاب بالإمارات: “بدأت افهم وكل ما تعرف بتبقى عايز تنجح زيهم ، ومش بس كدة قولت لأ انا عايز اعمل حاجة احسن منهم وعايزهم هما اللي يبصوا علينا ويشوفوا واحد ناجح من الوطن العربي ويعملو زيه”.
حديث محمد صلاح عن عمر مرموش
وأكمل: “مفيش لعيبة كتير في اوروبا طلعوا وعافروا، مرموش واحد من الناس دي وهو امكانياته عالية ولاعب مهم لفرقته ومع المنتخب كمان ، انا بس عايزه يبعد بس عن فكرة المقارنات ، الناس تبطل تقارنه بيا ، دا صلاح الجديد وهيعمل اللي عمله واحسن”.
وأشار: “انت كدة مش بتساعده انت بتحطه تحت ضغط طول الوقت ، مينفعش تقارنه بلاعب نجح بشكل كبير اوي في السنين دي كلها وهو لسه بيبدأ حياته ، سيبه يعيش تجربته وبتبسط بيها وعمل حاجة مختلفة عني”.
تجربة محمد صلاح مع تشيلسي
وذكر: “تجربتي في تشيلسي مكنتش ناجحة ومكنتش بلعب ، وبدل ما ألوم المدرب والظروف واصل انا مصري وعربي ، بدأت ابص للحياة بمنظور تاني عشان انجح”.
وأضاف: “في وقتها بدأت أقرأ كتير واشوف حاجات كتير على اليوتيوب ودماغي بدأت تتغير ، و الناس اللي غيرت في حياتي وافكاري وعقليتي دكتور ابراهيم الفقي والاستاذ مصطفى محمود”.
وواصل: “اللي أنصح بيه أي رياضي، انه دايمًا تحاول تقرأ في علم النفس ، لانك لو فهمت نفسك هتفهم الناس وتقدر تتعامل معاهم في كلامهم وريأكشناتهم وهتتعامل مع المواقف بشكل كويس”.
وأتم محمد صلاح حديثه: “انا عايش الحياة بالشكل اللي انا عايزه مش زي ما الناس عايزه ، مش فارق معايا الناس شايفه انا مفروض اعيش ازاي ، في الاخر دي حياتي انا مش حياتهم هما”.
