يا ترى إيه حكاية حقل ظهر اللي قلب موازين الطاقة في مصر؟ ومصر بتعمل إيه مؤخرا عشان ن تبقى مركز إقليمي للطاقة؟ وهل فعلاً هنصدر غاز لأوروبا قريب؟ وإيه الجديد في مناقصات التنقيب اللي اتفتحت؟ وهل ده معناه اكتشافات جديدة قريب؟ .. الأسئلة دي، وغيرها كتير هنحاول نجاوب عليها في الفيديو ده وهنشوف إزاي مصر بتكتب فصل جديد في كتاب الطاقة العالمي
خلونا نبدأ الحكاية بحقل ظهر اللي يعتبر أكبر اكتشاف غاز طبيعي في البحر المتوسط.. الحقل ده تم اكتشافه سنة 2015 على إيد شركة "إيني" الإيطالية واللي بعد كده تعاونت مع شركات مصرية علشان تبدأ الإنتاج في وقت قياسي. وفعلاً، في 2017، أول إنتاج للحقل ده بدأ يطلع للنور
حقل ظهر النهارده بيمثل أكتر من 40% من إنتاج الغاز في مصر وبيغطي احتياجات السوق المحلي وبيساعد كمان في تحقيق فائض للتصدير يعني مصر مش بس اكتفت ذاتياً من الغاز الطبيعي لأ ده كمان بقت لاعبة أساسية في سوق التصدير
طب ايه خطة مصر للتحول لمركز إقليمي للطاقة؟
خد بالك الموضوع مش بس عن اكتشافات الغاز مصر عندها رؤية أكبر من كده بكتير الدولة شغالة على خطة طموحة علشان تكون مركز إقليمي لتجارة وتداول الطاقة الخطة دي بتعتمد على 3 محاور أساسية
ـواهت البنية التحتية.. عندنا شبكة أنابيب غاز تمتد داخل مصر وخارجها، ومحطات إسالة غاز في دمياط وإدكو، واللي بيخلّوا مصر مكان مثالي لمعالجة وتصدير الغاز لدول أوروبا
وتانى حاجة التعاون الإقليمي.. مصر بقت جزء من منتدى غاز شرق المتوسط، واللي بيضم دول زي اليونان، قبرص، وإسرائيل. المنتدى ده بيشتغل على تنسيق الجهود بين الدول دي علشان يستفيدوا من ثروات الغاز في المنطقة
وتالت حاجة المناقصات والتنقيب.. مؤخراً مصر أعلنت عن مناقصات جديدة للتنقيب عن الغاز والبترول في البحر المتوسط والبحر الأحمر. وده معناه إننا قدام فرصة كبيرة لاكتشافات جديدة تزود احتياطياتنا وتدعم خطط التصدير
طب هل فعلا أوروبا محتاجة مصر فى الملف ده؟
خلونا نبص على الجانب الدولي شوية.. أوروبا النهارده بتواجه أزمة طاقة بسبب الحرب الروسية الأوكرانية والاعتماد الكبير على الغاز الروسي اللي بقى فيه مشاكل.. هنا بقى بيجي دور مصر مع قربنا الجغرافي من أوروبا وقدراتنا على إنتاج ونقل الغاز مصر ممكن تكون الحل الأمثل لأزمة الطاقة الأوروبية
والدليل إن شركات أوروبية كبيرة بقت بتدور على شراكات مع مصر زي الاتفاقيات الأخيرة اللي اتعملت مع الاتحاد الأوروبي وإيطاليا لزيادة صادرات الغاز المصري
بس خليني أقولك .. مصر مش مركزة بس على الغاز الطبيعي.. الدولة كمان شغالة بقوة على الطاقة المتجددة زي الشمس والرياح خصوصا في مناطق زي بنبان والعين السخنة والهدف هنا إننا مش بس نكون مركز لتصدير الغاز لأ ده كمان نبقى نموذج للطاقة النظيفة والمستدامة
فإجمالاً المشهد في مصر واعد جداً.. من حقل ظهر اللي حطنا على خريطة الغاز العالمي لخطة الدولة الطموحة في التحول لمركز إقليمي للطاقة وصولاً للاستثمارات الجديدة في التنقيب والطاقة المتجددة . مصر مش بس بتفكر في الحاضر لكنها كمان بتبني لمستقبل مشرق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
