إنت متخيل حياتك تكون كلها متسهلة بضغطة زر.. متخيل إنك تحول فلوس من أي مكان في العالم لأهلك وأصحابك في مصر في ثواني.. طب إيه رأيك لما أقولك إن ده بقى حقيقة، ومش مجرد كلام
البنك المركزي المصري دايمًا سابق بخطوة ومؤخرا أعلن عن حاجة جديدة ومبهرة خطوة بتأكد إن المستقبل الرقمي خلاص وصل.
دلوقتي المصريين اللي عايشين برا يقدروا يستخدموا إنستاباي لتحويل الفلوس بسرعة وسهولة لأي حد في مصر
سمعت عن إنستاباي قبل كده؟
لو مسمعتش، خليني أقولك .. ده التطبيق اللي غيَّر مفهوم التحويلات المالية في مصر بقى سهل وسريع وآمن
يعني إيه الكلام ده؟
يعني لو إنت في أمريكا، في الخليج، أو في أي مكان في العالم، مش هتحتاج أكتر من كام ثانية وتطبيق على موبايلك عشان تحول فلوسك وأكيد ده كله من غير أي تعقيدات أو مشاكل كانت بتحصل في الطرق التقليدية.. يمكن المركزي هيبدأ يتيح الخدمة دي فى الأول بس للناس اللى فى دول الخليج بكن ده هيتم تعميميه بعد كده وتقدر تبعت فلوس من اى حتة فى العالم.
طيب ليه الخطوة دي مهمة؟ وليه البنك المركزي بيهتم بالتحول الرقمي بالشكل ده؟
الإجابة ببساطة.. العالم كله بيتجه للتحول الرقمي، وكل يوم بنشوف تطورات جديدة في التكنولوجيا بتغير شكل حياتنا.. مصر كمان لازم تكون في المقدمة والبنك المركزي فاهم كويس أهمية ده.. والتحول الرقمي مش مجرد رفاهية ولا وجاهة ده أساس لتطوير الاقتصاد لتسهيل الحياة اليومية ولتحقيق الشمول المالي.. يعني كل الناس يبقى عندها فرص متساوية في استخدام الخدمات المالية بسهولة وأمان
إعلان البنك المركزي عن إمكانية التحويلات الدولية عبر إنستاباي بيأكد حاجة مهمة جدًا ان المصريين بالخارج جزء من التنمية.. ملايين المصريين اللي بيشتغلوا برا بيحولوا فلوس لأهاليهم بشكل مستمر.. والخطوة دي هتخلي حياتهم وحياة أهاليهم أسهل بكتير.. مفيش بقى وقت ضايع في انتظار الحوالة توصل، ولا رسوم تحويل عالية ولا إجراءات معقدة
حد ممكن يسأل ويقول هو ده كله آمن؟
الإجابة: طبعًا! إنستاباي بيشتغل بتكنولوجيا متطورة جدًا معتمدة من البنك المركزي ومصممة عشان تضمن إن كل معاملاتك المالية آمنة 100%..و البنك المركزي لسه عنده خطط أكبر وأوسع.
التحول الرقمي في مصر ماشي بسرعة وكل يوم بنسمع عن مبادرات جديدة.. والتطبيقات والخدمات اللي بتتطور دلوقتي مش بس بتسهل حياتنا، لكنها كمان بتفتح أبواب لفرص جديدة .. استثمار، تجارة إلكترونية، وحتى تسهيل المعاملات اليومية
في الآخر عايز أقولك إن الخطوة دي مش مجرد إضافة جديدة لإنستاباي أو خدمة للمصريين بالخارج دي رسالة واضحة ان مصر بتتحرك بتتطور وبتحط التكنولوجيا في خدمة شعبها
لو أنت لسه مجربتش إنستاباي جربه النهارده وشوف بنفسك قد إيه حياتك ممكن تبقى أبسط وأسهل وأشرع وكمان فلوسك فى الحفظ والصون .. وخليك فاكر دايما .. البنك المركزي المصري معاك وفى ضهرك.. و دايمًا سابق بخطوة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
