إيه أكتر حاجة بتهمك لو بتستقبل حوالات من بره مصر.. السرع؟ الأمان؟ ولا تكون فلوسك في حسابك في نفس اللحظة؟.. لو بهمك كل ده البنك المركزي المصري جايبلك الحل.. خدمة جديدة لأول مرة هتخليك تستلم حوالاتك من الخارج وتلاقيها في حسابك فورًا، 24 ساعة في اليوم، طول الأسبوع! إزاي ده هيغير حياة ملايين المصريين؟ وده معناه إيه لتحويلات المصريين من الخارج؟ .. ده اللى هتعرفوا فى التقرير ده
البنك المركزي المصري بيواصل خطواته لتطوير الخدمات المالية وتعزيز التحول الرقمي المرة دي بخدمة جديدة هتفرق مع كل حد عنده حوالات من الخارج.. الخدمة ببساطة بتسمح بإضافة الحوالات اللي جاية من بره مصر لحسابك البنكي مباشرة وفي نفس اللحظة يعني مفيش تأخير مفيش وقت انتظار.. يعنى مش هتسمع كلمة الحوالة لسه ما سمعتش تاني
الخدمة دي بتشتغل من خلال شبكة المدفوعات اللحظية “انستاباي” واللي أطلقها البنك المركزي من سنة 2022 كجزء من خطته لتحسين نظم الدفع الإلكتروني..و الشبكة دي عبارة عن نظام متكامل بيخلّي كل عمليات التحويلات المالية تحصل لحظيًا على مدار 24 ساعة وطول أيام الأسبوع.. يعني لو حد من أهلك أو أصحابك في الخارج بعتلك فلوس في أي وقت الفلوس هتوصل لحسابك البنكي فورا وتقدر تصرفها في لحظتها سواء من فروع البنك بتاعك أو من خلال ماكينات الصراف الآلى المنتشرة فى كل شوارع مصر
الخدمة دي مش مجرد خطة على ورق.. البنك المركزي بدأ الإطلاق التجريبي ليها من شهر يونيو اللي فات..وفي المرحلة دي التحويلات بتتم من خلال بنوك أجنبية وشركات صرافة في الخارج اللي بتتعامل مع البنوك المصرية اللي فعلت الخدمة وده كجزء من تطوير شبكة المدفوعات اللحظية والهدف الأساسي إن الحوالات تبقى سهلة وسريعة وآمنة لكل المصريين اللي بيعتمدوا على التحويلات من الخارج.
وخد بالك الخدمة دي هتعمل نقلة نوعية في الطريقة اللي المصريين بيستلموا بيها الحوالات من بره ليه؟
لأنها هتساعد ملايين العملاء على استخدام الخدمات الرقمية في تعاملاتهم اليومية.. وده مكمل لنجاح تطبيق إنستا باي اللي تم إطلاقه في 2022.. التطبيق ده واللي هو جزء من شبكة المدفوعات اللحظية وصل عدد المستخدمين عليه لأكتر من 11.5 مليون عميل ومتوقع إن المعاملات عليه تتخطى 2.7 تريليون جنيه بنهاية 2024
الخدمة دي مش بس مفيدة للمواطن لكنها كمان خطوة ذكية لدعم الاقتصاد المصري.. لأن التحويلات من الخارج بتلعب دور كبير جدا في توفير العملة الصعبة وبتساهم في تحسين الاحتياطي النقدي.. وكل ما كان استقبال الحوالات أسرع وأسهل كل ما هيبقى فيه تشجيع أكتر لتحويل الأموال لمصر بدل اللجوء لطرق غير رسمية
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
