ليه الصناعات الغذائية في مصر بتعتبر واحدة من أهم القطاعات اللي بتقود الاقتصاد؟ وإزاي الشراكة الجديدة بين البنك التجاري الدولي وغرفة الصناعات الغذائية هتغير قواعد اللعبة؟ و إيه أصلا اللي يخلي بنك زي التجاري الدولي - CIB يدخل شريك مصرفي رسمي لغرفة الصناعات الغذائية؟
صادرات الصناعات الغذائية والحاصلات الزراعية لوحدها وصلت لـ 8.8 مليار دولار سنة السنة اللى فاتت والمستهدف نرفع الرقم ده لـ 10 مليار دولار بنهاية 2024.. وده مش كلام وخلاص ده جزء من استراتيجية مصرية واضحة للوصول بالصادرات لـ 100 مليار دولار قريبًا.
ومن ساعات وعلى هامش المؤتمر السنوي للصناعات الغذائية أعلن البنك التجاري الدولي توقيع اتفاقية تعاون مع غرفة الصناعات الغذائية هيكون من خلالها شريكهم المصرفي الرسمي لسنة 2025
البنك هيقدم مجموعة حلول مالية وغير مالية للشركات أعضاء الغرفة. يعني تمويل لرأس المال العامل وحلول تمويل التجارة وتأهيل الشركات للاستعداد للتصدير.. وكمان تمكين الشركات الصغيرة والمتوسطة إنها تدخل أسواق جديدة وتنافس عالمياً
مش بس كده.. البنك هيكون موجود في كل الفعاليات اللي بتنظمها الغرفة وهيعقد ورش عمل ولقاءات مع الشركات لدعمهم بكل الطرق الممكنة
طب ليه الصناعات الغذائية مهمة للدرجة دي؟
خليني أقولك شوية حقائق.. غرفة الصناعات الغذائية هي واحدة من أكبر غرف اتحاد الصناعات في مصر، وبيضم حوالي 24 ألف شركة.. والقطاع ده لوحده بيقود النشاط الصناعي والتصديري.. والمشروعات الصغيرة والمتوسطة فيه مش بس بتساهم في الإنتاج لكنها كمان بتدعم التمكين الاقتصادي للسيدات
وده اللي خلى المهندس أشرف الجزايرلي، رئيس الغرفة، يقول إن الشراكة مع التجاري الدولي خطوة مهمة لتحقيق الاستدامة وفتح أسواق تصديرية جديدة مع التركيز على تحقيق أعلى معايير الجودة وسلامة الغذاء
طب ايه دور التجاري الدولي في الشراكة؟
البنك التجاري الدولي مش مجرد بنك ده مؤسسة بتدعم الاقتصاد من كل الزوايا.. عمرو الجنايني نائب الرئيس التنفيذي بالبنك أكد إنهم بيدعموا توطين الصناعات المصرية وخصوصًا قطاع الصناعات الغذائية باعتباره محرك أساسي للنمو الاقتصادي
رشوان حمادي، الرئيس التنفيذي لقطاع التجزئة المصرفية والشمول المالي بالبنك وضح وقال إن البنك مش بس بيوفر تمويل، لكن كمان خدمات غير مالية من خلال برنامج Business Solutions.. وده بيساعد الشركات في التطوير والوصول للأسواق الخارجية.
وكمان في حلول رقمية متقدمة زي بوابة التجارة GTB، اللي بتخلي العمليات المصرفية أسهل وأسرع من فتح الاعتمادات المستندية لمستندات التحصيل وكل ده أونلاين 24 ساعة في اليوم
خلاصة الكلام الشراكة بين CIB وغرفة الصناعات الغذائية خطوة بتأكد إن القطاع الخاص والدولة قادرين يشتغلوا مع بعض لتحقيق نمو حقيقي ومستدام للاقتصاد المصري
فيا ترى هل مصر فعلاً على أعتاب طفرة جديدة في الصادرات؟.. واضح كده إن الطريق للـ100 مليار دولار بدأ فعلاً.. والشغل مشي بمنتهى السرعة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
