يا ترى لو ناوي تشتري سلع غذائية أو جهاز كهربائي أو أي حاجة من مستلزماتك، تنزل امته،.. وإزاي تختار سلعة سليمة مفيهاش أخطاء وميبقاش فيها مغالاة، وإزاي تتجنب إنك يتنصب عليك.. هنقولك كل التفاصيل في التقرير ده.
كتير من الناس منتظرين بفارغ الصبر الجمعة البيضا واللي هي الجمعة الأخيرة من شهر نوفمبر، وده مش بس في مصر لأ دي فعالية عالمية، بتطرح فيها الشركات والمتاجر السلع بتاعتها عشان تتخلص منها، وكمان تتحصل على مكاسب منها في المناسبة دي.
عشان كده، لو حضرتك ناوي تنزل تشتري سلع أو مستلزمات في الجمعة البيضا فلازم تاخد بالك من شوية نصايح مهمة، هتساعدك في انك تتجنب عمليات الغش التجاري.
وأول النصايح دي، هي تجنب الإعلانات الوهمية، لازم تحذر الانسياق وراء الإعلانات اللي بتدي بخصومات كبيرة على السلع، خاصةً على مواقع التواصل الاجتماعي، لأن اغلبها هدفها جر رجل الزبون بدون وجود خصومات حقيقة أو واقعية.
كمان لازم حضرتك تتحقق من مصداقية الإعلانات ولا تثق بالعروض اللي شكلها غير معقول، يعني خليك ناصح.
ولو نويت تشري، فاختار البياعين المعتمدين، وابعد عن الشراء من صفحات التواصل الاجتماعي الغير المعتمدة، لأنها مش هتقدر توفر لك بيانات واضحة زي العنوان، ورقم الهاتف، والموقع الرسمي، أو السجل الضريبي، وماتنساش تتأكد من الشراء عبر صفحات المتاجر المعتمدة واللي عندها مقرات داخل مصر.
وخليك حريص انك تحصل على فاتورة، يعني تتأكد دايما من حصولك على فاتورة أو إيصال استلام، لأن ده هيضمن لك حقوقك وهيساعدك في حالة وجود مشكلة أو لو انت عايز تستبدل المنتج أوترجعه.
وخد عندك طرق الإبلاغ عن المخالفات، لو حضرتك واجهت أي مخالفات أو ممارسات تجارية غير منضبطة، فلازم تبلغ من خلال الوسائل التالية، اللي اولها الاتصال بالخط الساخن 19588 لحماية المستهلك.
أو تطبيق جهاز حماية المستهلك، اللي ممكن تقدم عليه الشكوى، والتطبيق المتاح على جوجل بلاي وأبل ستور، أو كمان الموقع الإلكتروني لحماية المستهلك المتاح على الإنترنت.
ضيف على كل ده، صفحة الفيسبوك التابعة لجهاز جهاز حماية المستهلك المصري، وهي صحفية رسمية موجودة على فيسبوك، وهتابع معاك أول بأول الشكوى بتاعتك لحد ما تحلها.
ولو مالكش في النت، فممكن تروح مقر الجهاز، واللي هز في 96 شارع أحمد عرابي بالمهندسين أو 115 ب القرية الذكية، بالإضافة إلى كافة الأفرع الإقليمية المنتشرة في جميع محافظات مصر.
وفي النهاية، لازم حضرتك تتبع النصائح دي، عشان هنساعدك إنك تجنب الاحتيال او تقع فريسة للنصب، وماتحطش فلوسك في الفاضي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
